શ્યામ તમે એક વાર રાધાને રીઝવવા ગોકુળિયે ગામ ફરી આવો

શ્યામ તમે એક વાર રાધાને રીઝવવા
ગોકુળિયે ગામ ફરી આવો,
ખળભળતાં યમુનાનાં જળને શમાવવા
કાલીન્દિકાંઠ જરી આવો.
તડકો બપોરનો ગોકુળનો માગે છે
વાંસળીના વાયરાની છાયા,
કેકારવ મોરલાનો ચુપચાપ સાદ દઈ
પીડે છે પોતાની કાયા;
ગાયોની પાંપણને ખૂણેથી લૂછવા
આંસુને દ્વાર જરી આવો.
કોઈ હવે તમને નહીં કનડે કે ચોરીનું
આળ કોઈ માથે નહીં નાખે,
માખણ ને મહીયારાં બેઉ છે તમારાં, જરા
સરખો યે ખાર નહીં રાખે;
વાંસળીના સૂરે હૈયાધારણ થઈને તમે
રાધાને દ્વાર જરી આવો... શ્યામ તમે...